Prunksitzung 2021
Prunksitzung
Prunksitzung
„Holde Närrinnen unn Narralese, ledschdes Johr war nix gewese.
Drum iss des Johr uff jeden Fall Remmidemmi do im Saal.
Dass eich de Wirus nett verwischt, gilt heit‘ dohin die Maskepflischt.
Unn damit niemand was bassiert, habbt ihr eich all‘ ganz doll maskiert.
Doch nun genug mit dem Geschwätz, drauße wartet nämlich jetzt
enn Dummbabbler der Extraklasse. Woll’n merr’n jetzert kumme losse?“
Die Musigg schbielt enn Fassnachtshit, de Redner krawwelt in die Bütt‘.
Wuff täää!!!
„Manche mänen, ich wär‘ dumm, bloß weil ich aus emm Saarland kumm‘.
Ganz frieh hab‘ ich schunn Sache g’macht, do hott mich jeder ausgelacht.
Mein Lehrer määnt, ich wär‘ so bleed, dass des locker reiche deed,
dass, ich will nett iwwertreiwe, zwää, drei Klasse hockebleiwe.“
Wuff täää!!!
„Kenne ner beriehmte Männer mit B?“ Korz iwwelegt unn Finger in die Höh!
Ich sag‘: „Basler, Ballack, Beckenbauer!“ Ich merk‘, mein Lehrer iss jetzt sauer.
Irgendwie wirkt er verschdört, „Brahms, Brecht unn Bach! Hoscht vunn denne schunn g’heert?“
Ich hab‘ iwwerlegt, doch g’nitzt hot dess nix: „Wuher soll ich wisse, wer Ersatzschbieler iss?“
Wuff täää!!!
„Ich bin mol durch Saarbrigge g‘loffe, habbs schnucklische Elvira g‘troffe.
Mer hänn uns glei innenonner verliebt. Ich finn‘s doll, dass es sowas noch gibt`?
Die war a mol sauer unn `s hott re gschdunke, dass ich länger fort war unn hat was getrunke.
Do hab‘ ich gemerkt, ich muss se verwöhne, donn könnten mer Zwee uns wieder versöhne.
Ich hab in me Haufe Proschbekte g‘sucht unn dann dort verzeh Dag Kreuzfahrt gebucht.
Ich hab‘ schnell g‘merkt, des war nett de Hit. Die hott nämlisch g’mänt, sie dürft‘ do a mit.
Wuf täää!!!
Dann habb isch verschbroche, ich det am Sunndach was ganz Leckeres koche.
Frisches Bagett unn edle Schnecke, die wollt‘ ich unner Budder in Heiser verschdecke.
Doch dodezu muscht erscht Schnecke fange, moin Pälzer Froind iss uff die Pirsch mit mir gange.
Ich wiehl im Gras unn unner de Hecke, nach re Stunn hawwich dann schunn vier dicke Schnecke.
De Pälzer hott locker weit iwwer zwanzisch, unn wie er moi Viere sieht, kriegt er was an sich.
„Sach mol, hoscht du a was g’schafft, odder die ganz‘ Zeit bloß in die Luft gegafft?“
„Ich schleich mich vunn hinne an die Schneck‘, awwer bis ich mich gebickt hab‘, flitzt die weg!“
Wuf täää!!!
„Jetzt awwer Schluss, ich muss hämwärts dabbe, eh die im Saarland die Trottwar hochklabbe!
Die sagen dann, dass ich Pech g’hatte hab, ich schdeh vor de Deer un moi Wisum laaft ab.
Die Palz iss subber, doch muss ich bedenke: Ich mag Lyoner unn hab‘ Schbass am Schwenke!
Iss bei eich odder uns die Schdimmung mol drieb: Lossen se owwe die Gellerrieb‘!“
Wuf täää!!!
Autor:Peter Fruth aus Eppstein-Flomersheim |
Kommentare
Sie möchten kommentieren?
Sie möchten zur Diskussion beitragen? Melden Sie sich an, um Kommentare zu verfassen.